Wohnen mit anderen Familien / Gleichgesinnten, was meint Ihr?

Es isch vermuetlich eifach ned einfach. Es esch wie inere Partnerschaft: Es bruucht regelmässigi Pfläg. Wer dr Ufwand ned schüücht: Warum ned sich de Traum erfülle??

Ja da hesch rächt.
Mir si äbe au chli der meinig das mir mönsche nümme de muet hei würklich au verbindlichi bezihige ii z ga. Da mir immer spontaner, churzentschlosse üs umentscheide chöi, isch jedi verpflichtig meh last.
Und mir dänke das verlässlichkeit äbe au sis schöne het, aber au si priis.
Üsi devise isch aber scho au: jede sini wohnig, si garte, si sitzplatz usw. Es isch schöner weme de cha zäme cho wöu me wott, und nid nur wöu eim nüt anders blibt..

für söttegi tröim gits doch d gnosseschaftssidlige?! We ja de gliich alli ihri eigeti wohnig und sogar ihre eigete sitzplatz wei?

bi mir gsächs de ehnder so uus, dass me im gliiche huus wohnti und me dert e grossi chuchi hätt und sini zwe eigete rüüm...

S`wird wohl au sehr schwierig sy, es passends Huus oder Wohnig überhaupt z`finde. Ich würd eifach mol afah sueche und s`träume noh es bitzeli an Nagel hänke vorerscht. Und dezue guet im vorus vorbereite wo du denn emol inseriere wettisch für Mitbewohner, wenn denn e Wohnglägeheit do isch. Das muess denn ruckzuck goh. Zuerscht öpper finde und denn Wohnglägeheit sueche isch glaub der`falschi Wäg... ich befürchte würklich dass es enorm schwierig esch en passendi Bleibe z`finde. Und es sell jo vor allem au dir gfalle-!! :-))

Mir sind dranne bi üs in sumiswald im emmental so ä idee umzsetze bis öppä in 2 jahr. Hend ihr immerno interesse a some projekt?

Sehr e schöni Idee!

Wichtig zum für sich abkläre, isch sicher Folgendes: Was isch euri Motivation? Wo gsehnd ihr dr Mehrwert für euch? Was erhoffet ihr euch vom gmeinschaftliche Wohne?

No e Gedanke:
Zum es Huus chaufe, brucht me halt vill Gäld. Je nach Ort brucht me denn fast au no es Auto.(Usser me schafft nid uswärts)
Das chostet halt alles vill Gäld.

Eso muess me halt entsprechend vill schaffe zum sich dä Traum verwirkliche z chönne und isch weniger Zit gmüetlich deheime und cha Begegnige ha.

Eventuell lohnts sich, zerst mol 2-3 Jahr inere bestehende Gmeinschaft z läbe und chli "schnuppere", usefinde, was eim wichtig isch etc.?

Liebi Familie Tröimli

Isch Euers Inserat no aktuell oder hend ier Euri "Familie-WG“ schu gfunde?
So oder so, mier würend üs freue uf en Ustuusch zu dem Thema, will mier au uf dr Suechi sind noch enere Gmeinschaft. Nüm allei, zäme gots ringer! ;-)
Biz zu üs: mier sind e Familie (40 und 35) mit üser Tochter (10 Mönet), es Baby im Buuch und d Frau bringt no 2 Töchtere (9 und 7) mit us 1. Ehe wo aber nur all 2 Wuche es WE und zu de Schuelferie bi üs sind.
Mier läbend im Moment im Konauer Amt, isch schön do aber kein Muss. Es git überall in dr Schwiiz schöni Eggli und Objekt, wo nur druff wartend, (wieder-)beläbt z werde.
Ggf. au in Form vume Wiiler oder chline Siiedlig für mehereri Familie? Üseri Vision isch in Richtig Selbständigkeit und Unabhängigkeit vu System und Zwäng (Schuel, Impfe, 5G etc.). Halt ebe, solang das no irgendwie möglich isch.
Das erfoderert natürlich es guets mitenand, es zäme Träge und Unterstütze. Isch meh als nume schöni Natur z ha und gnüsse-Läbe als Chance zum Wachse, sich z pfläge und grösser z werde.
Mier würend üs freue, vu Eu z ghöre, wo ier so stönd in Eurem Prozess!
Liebe Gruess vu üs 4
Beat, Nadine, Ronja Erina und Baby im Buuch

Hallo, wo denn?
Wir hätten interesse. Bin verwitwet und habe eine 10 jährige Tochter.
Freue mich zu hören.
Lg